糖醋金沙骨

响UNY買左幾條金沙骨，又唔想就咁用叉燒醬，於是整左個糖醋金沙骨。

後來上網先知呢個就係流傳緊嘅數字骨呢！

糖醋金沙骨

材料：

金沙骨 - 3至五條

茄汁 - 4湯匙

白醋 - 1湯匙

糖 - 1湯匙

生抽 - 2湯匙

生粉 - 1湯匙

蜜糖 - 3湯匙

做法：

1）金沙骨解凍後加入以上調味醃（蜜糖除外）30分鐘（過夜更好）

2）焗爐預熱200度，連汁放入焗爐焗20分鐘

3）拎出塗上蜜糖每邊再焗3分鐘

4）搞掂食得！

吞拿魚包

都幾鐘意做造型包

因為來來去去果幾個步驟，只要改變一下個涵就能變得千變萬化

以前未有麵包機，朝朝早就係食美嘟嘅吞拿魚包，而家，冇買包好耐lu （招積地吹口哨）

呑拿魚包

材料：

初部發烤麵團一個

大水浸吞拿魚一礶
5蚊粟米粒

旦黃醬約5湯匙
Mozzarella 芝士3塊

胡椒粉隨意
鹽隨意

做法:

1) 粟米粒出水, 印乾

2) 吞拿魚隔乾水後加入胡椒粉, 鹽, 粟米粒及旦黃醬調好味

3) 初步發烤麵團分割8份, 滾圓發15分鐘

4) 壓平加入吞拿魚醬

5) 加入芝士片(做出有PIZZA HUT 拉一絲絲效果)

5) 放入未焗爐靜待30分鐘

6) 拎出黎之後開焗爐預熱180" (約15分鐘)

7) 入焗爐20分鐘

8) 搞掂食得!

泰式香草茶

早排去左清邁上左個cooking class,

教整餸之餘請左我地飲香茅水，好好飲但係冇教我地點煮。

最後一日行街市同果到的華人嬸嬸吹下水，佢教左我地，好易好簡單呢！

泰式香草茶

材料：

香茅（冇用的部份-即頭部）- 4枝

乾斑蘭葉 - 7塊

姜 - 1小舊

冰糖 - 1小粒 （可唔落）

水 - 1.5 升

做法：

1）煲水

2）水滾後加入香茅，斑蘭葉及姜煲45分鐘

3）熄火 （或呢個時候加冰糖）

4）暖飲或雪凍飲都得，搞掂！

乾班蘭葉

剁椒木耳絲

買了些乾木耳絲，一直都冇時間食。

今日弄了個冷盤剁椒木耳絲，又幾開胃喎！

剁椒木耳絲

材料：

乾木耳絲-1執份量

剁椒-1.5茶匙

鎮江醋-3-4湯匙

蒜蓉-約3-4瓣

姜蓉-少許

砂糖-2茶匙

花椒油-少許

做法：

1）木耳絲乾先用水浸一個鐘之後出水間水備用

2）隔水後加入剁椒，蒜蓉，姜蓉，鎮江醋，糖，花椒油拌均

3）放雪柜雪凍後搞掂

註：

1）邊拌均邊調出自己的口味

2）改用大閘蟹醋會好味得多

咖哩牛肉包

病足兩星期，今天精神好返點，立即整下野先得

咖哩牛肉包

材料：
免治牛肉 300克
什豆 半包 （在街市買的散裝什豆）
數字屋咖哩包 1包
芝士 隨意 （可以唔加）

做法：1）免治牛肉先用豉油豆粉糖醃一陣；什豆用熱水浸一陣（以防雪味）隔乾水
2）凍油落鑊（因為用鑄鐵鍋），落牛肉，炒至大半熟加入什豆；最後加入咖哩包兜均，上碟待涼
3）初部發酵麵團分割10分滾圓加保鮮紙待15分鐘
4）造型 - 壓平放咖哩牛肉，包好
5）第二次發酵 （放沒有預熱之焗爐45分鐘至兩倍大）
6） 拎出黎預熱至180度；焗15分鐘
7）拎出黎等冇咁熱，食得！

榨菜肉碎米

諗住是晚求烚菜魚肉一餐，點知大相來電話想食米粉。

急急睇下雪柜有乜加碼先。

好彩前晚醃定左d肉碎, 咋咋淋肉碎魚肉米粉交功課!

榨菜肉碎米

材料:

豬肉碎 - 10 蚊 (先用醃料三寶醃15 分鐘 - 豉油, 豆粉, 糖; 但閒時我會加花椒油)

味真棧榨菜云耳一包

米粉 - 2 個 (片)

魚肉 - 10 蚊

菜 - 大半斤

 

做法:

1) 先把米粉浸淋 (如時間唔夠, 用熱水浸可快10倍), 浸淋後隔水

2) 凍鑊落油, 燒熱加豬肉碎; 煎到兩面金黃金黄加榨菜云耳, 兜熱後剪2隻辣椒仔 - 裝起

3) 同時煲滾水, 加雞粉; 水再滾時用湯匙刮魚肉(記得先浸匙更以防魚肉痴住)

4) 加菜至滾起後加入已淋之米粉; 灑上胡椒粉及麻油

5) 搞掂!

快靚正的一餐!

腸仔包

最近天氣熱, 搞到方包(吐司)成日變矮仔; 冇咁好食之餘又令人頹頹地.
於是繼上次叉燒包後做左呢個腸仔包了.


腸仔包


材料:
初步發酵麵團 1 個
廚師腸 1 包
蜜糖水 少許


做法:
1) 腸仔溶雪, 之後用熱水浸一陣等佢冇咁咸(如你用的腸仔唔咸可Skip 出水呢部份), 吸乾水
2) 麵團排氣, 之後分成10 份滾圓, 用保鮮紙蓋著等15分鐘(麵團約大左1倍)
3) 捽長麵條約20CM 長, 之後包住腸仔卷(記得開口,收口同一方向; 响底"宅"住)
4) 放入未加熱的焗爐45分鐘作第二次發酵
5) 拎返出黎, 焗爐加熱至180' 度
6) 焗15分鐘
7) 最後3-4分鐘拎出黎, 面掃上蜜糖水, 繼續焗
8) 出爐搞掂!

註: 蜜糖水唔使開咁稀, 我就係開得太稀, 所以包面淋左小小; 另如果有芝麻可以加埋上去,
咁樣會香D同靚仔D.

粟米湯

呢排唔知點解除左荔枝平外，粟米都幾平。

有時10蚊有3支。唔抵得放菜格, 睇下會唔會蒸黎食。

耐得濟見乾緊水, 於是咋咋淋做個濃湯先！

粟米湯

 

材料： 

粟米- 2支

雞粉 - 1茶匙

鹽 - 少許

什錦香草 - 少許

水 - 800ml

做法：

1）把粟米切粒，之後把所有調味放到豆漿機

2）加少按濃湯mode

3）等响機， 食得！

香茅雞中翼

呢味餸, 不論燒野食定入焗爐都咁好食.

得閒記得醃定看門口!

香茅雞翼

材料：

雞翼： 10隻

香茅 2 支 （拍扁切碎）

紅蔥頭 2 粒（切碎）

蒜蓉 3粒 （切碎）

青檸 1 粒 （只要汁）

魚露 1 湯匙

糖 1 湯匙

做法：

1）雞翼溶雪抺乾，加入以上材料醃2小時或以上

2）焗爐180' 度預熱

3）每面焗15分鐘

4）搞掂！

註：如果可以加多一至两支香茅會更香

鱷魚肉煲海底椰

响吉佬買左鱷魚肉海底椰湯包, 放左幾個月都唔知點搞好.

請教過森媽後都係快手KO 佢先, 個湯包好阻定呀!!

鱷魚肉煲海底椰

材料:
鱷魚肉海底椰湯包 1 份
瘦肉 20 蚊
川貝 少許 (因在森媽到拎, 所以唔知份量 - 建議去藥材舖叫佢地預比你)
果皮 1 塊
水 6 碗水

做法:
1) 先把瘦肉, 鱷魚肉飛水
2) 凍水加果皮煲滾, 水滾後加入瘦肉, 鱷魚肉, 海底椰及川貝
3) 再次水滾後轉細火煲2個鐘
因我用LC 煲較鎖水, 所以我水滾煲半個鐘, 關火焗半個鐘X3 次
(原理是利用煲內餘熟做對流, 等佢自己繼續煲)
4) 搞掂飲得!

註: 森媽教果皮要凍水一齊落咁就唔會燥

叉燒餐包

買左麵包機個幾月，硬係心思思想搞花臣（一如人馬座性格〜不安於現狀）

大相公話佢最鐘意食就係叉燒包, 見佢返工咁辛苦，梗係整D佢鐘意食既野慰勞吓佢啦。

求其買左15蚊叉燒, 點知只係夠整4個包，成本都幾貴喎！大相公真識食！

為左減低成本，唔通要自己焗埋舊叉燒？（思考中。。。）

叉燒餐包

材料:
已初步發酵麵團  1 個

叉燒 15蚊(秤過約150g)(切粒)

洋蔥 1 個 (切碎)

獻汁

蠔油 1 湯匙

糖 2 茶匙

水 4 湯匙

粟粉 1茶匙

做法：

1) 先把洋蔥炒至透明，加入叉燒及獻汁至杰身； 裝起担凍備用

2) 麵團均分約60g 一份，滾圓加保鮮紙放5分鐘作初部發酵（約發大一倍）

3) 把麵團按扁，加入叉燒餡，包起收口放底

4) 把已包好的準叉燒包放焗爐作第二次發酵（盤中間放碗熱水，關門等45分鐘）

5) 𥄫實佢，此時麵包應該發大左2倍

6) 拎返盤飽出黎先預熱焗爐180度

7) 夠度數可以入爐焗15分鐘

8) 約最後3分鐘可加蜜糖水及旦液等佢靚仔D（不過今次我冇加）

9) 夠鐘拎返出黎抖下先好食！

註：整左4個包，拎左個比森爸食，大讚啡呢骨（very good)！

食譜

响未寫前整左唔少野食, 諗起既有: B仔雞翼尖, 話梅豬手, 芒果糯米滋, 檸檬芝士餅.... 真係後悔一味掛住食, 一張相都冇留底; 唔知幾時再整先有得重見天日了.

餃子蝦籽撈

放工做完運動又累又肚餓，唔敢食大野於是求其簡食頂頂肚。

找來紅磡張榮記蝦籽麵, 明德醬園既蝦籽,   配埋荃灣民豐既冬菇菜肉餃子, 冇味精全天然, 叫做冇咁罪惡啦（鬼臉~~溜）

餃子蝦籽撈

材料:
蝦籽麵 - 1 個
水 (上湯用) - 300ml
蝦籽 - 1 湯匙
水 (餃子用) - 500ml
餃子 -  3 隻

做法:
1) 煲500ml (或更多), 水滾落小小油, 落餃子至熟, 拎起用食水沖一沖
2) 煲300ml 水, 水滾落蝦籽麵, 一路煮一路揚開至麵啱啱淋, 夾起上碟
3) 煮蝦籽麵水已成上湯, 加入蔥花
4) 蝦籽麵洒蝦籽, 旁放餃籽
5) 食得

蕃茄薯仔濃湯

我地呢D在職婦女, 煲得啖湯黎要成10點幾;
但係女人多少都要D湯水, 於是上年的生日禮物我竟然收到一個豆漿機!!
(生日禮物一般唔係鑽石, 手袋, 名牌野咩?! 點解結左婚既生日禮物會係家庭電器㗎 ?)

都收左, 咁梗係用啦....

而用得最多既一個分唇 -- 濃湯毛 (濃湯Mode)

因為蔬果全部打成濃湯, 即係所有纖維直接飲左落肚到, 自我感覺良好呢!

蕃茄薯仔濃湯

材料:
蕃茄- 4 個
薯仔- 1 個
鰹魚粉- 1 湯匙
什錦香草乾 - 1 荼匙
黑椒碎 - 1 荼匙
鹽 - 火許
水 - 800ml

做法:
1) 蕃茄及薯仔洗淨成大小放入豆漿機內
2) 加入所有調味
3) 倒水加蓋按濃湯制式
4) 等响機 -- 搞掂

白汁海鮮意

近排因為減月巴，閒日通常都係簡食（求其煮斤菜食）； 所以只有星期五, 六, 日先叫食得重口味少少。。無計啦，天生麗質，食少少都脹爆，唉。。。

白汁海鮮意

材料:

意粉 - 150 g

金寶海鮮蘑菇湯 - 1 礶

海鮮 - 隨意 (今次有蟹柳, 青口, 蝦, 墨魚頭, 刺身用帶子)

洋蔥 - 1個

煙肉 - 2 條 (切碎)

做法:

1) 因為用哂急凍海鮮, 溶雪印乾水後用胡椒粉及小小鹽醃一下(15-30分鐘)

2) 滾水加鹽, 油後落意粉, 根據包裝指示煮淋 (我呢包响數字屋入手, 只要焗1分鐘便食得)

隔水備用 (好方太的一句說話, 哈哈); 同時開定金寶湯

3) 落小小油, 加煙肉 (真係要好小油, 用黎引煙肉出油用), 爆香洋蔥

4) 洋蔥淋身後加入海鮮(帶子除外) 繼續兜至熟

5) 加入已熟的意粉, 加小小黑椒;

6) 加金寶湯 (因太杰身, 要加大半礶水) ; 右手筷子, 左手叉, 快手拌勻湯汁, 意粉及海鮮

7) 完成時把帶子放入意粉堆, 用熱力迫熟

8) 加少許香草响面扮下野 (可唔加)

9) 搞掂

註:

1) 方太乃8, 90年代亞視有名煮持人

2) 金寶湯如果開太多水會變湯意及冇乜味

荔枝煙肉串

今年荔枝當造，大相公响大陸拎左10斤返來都只係60蚊！

記得上次响和幸食過煙肉串， 於是拎埋果少少黎回味下先！期間限定嘛！

荔枝煙肉串

材料:

荔枝 - 20 粒

煙肉 - 10 塊

竹簽 - 10 支

做法:

1) 煙肉溶雪, 一開為二

2) 荔枝去皮去核 (盡量Keep 完整一粒)

3) 焗爐200度預熱15 分鐘

4) 煙肉包住粒荔枝, 3粒一串

5) 放焗爐, 目測至煙肉乾身(記得2面要反下)

6) 搞掂

註:

1) 荔枝用糯米滋會較好(因為較多汁)

2) 因為多汁, 所以煙肉較難焗至乾身, 所以我都係焗到金黃金黄色, 香香口就算

土匪雞翼

得閒醃定幾隻雞翼放雪柜，夜唔夜放工都有肉食啦！

土匪雞翼

材料：

雞翼 - 8 隻

調味料:
孜然粉 - 4湯匙

五香粉 - 1/2 茶匙

花椒粉 - 1湯匙

芫茜籽粉 - 1 湯匙
辣椒乾碎 - 1 湯匙
胡椒粉 - 少許
黑椒粉 - 少許
糖 - 1 茶匙
鹽 - 1 茶匙

做法:
1) 雞翼溶好雪再用廚紙抺乾
2) 所有調味料加入雞翼醃2小時或更長時間
3) 焗爐200度預熱15分鐘
4) 雞翼每底面各焗20分鐘至熟 (如有黑芝麻, 可以放上雞翼面先焗)
5) 搞掂食得

註: 其實呢味餸屋企有咩中式調味料加哂入去唔會輸得去邊

海鮮PIZZA 2

繼上次ROUND 1後, 方便又快捷, 於是買定2 個餅底看門口.
第時就算懶起來屋企都可以有野食.

再黎海鮮PIZZA, 加重芝果然唔同D!

海鮮PIZZA 2

材料:
餅底 - 1 個
茄膏 - 1/4 礶
鹽水吞拿魚 - 1 礶(大)
急凍蝦仁 - 6 隻
急凍青口 - 4 隻
香草 - 隨意 (我用左Parsley)
Mozzarella Cheese: 大量

做法:
1) Pizza 底室温放軟; 急凍蝦, 青口溶雪吸乾水後用鹽醃一陣; 吞拿魚隔乾水
2) 茄膏查餅底
3) 把蝦, 青口, 吞拿魚鋪在餅面
4) 加大量Mozzarella Chesse, 芝士上加香草
5) 入焗爐以200度焗20 分鐘
6) 搞掂

註: 原來芝士係要多到睇唔到d餸先至有效果.

家鄉咖哩雞

難得大相公落order 話要食咖哩；即刻諗起上次去友人家，工人姐姐整----充滿南洋風味的家鄉咖哩.

於是發短訊問佢拎食譜作參考, 配埋自家的法包，食到大相公lam lam lee!

家鄉咖哩雞

材料：

急凍雞扒 - 2塊

甘筍 - 4條

薯仔 - 2個

洋蔥 - 2個

蕃茄 - 1個

香茅 - 4支

紅蔥頭 - 3粒

蒜頭 - 4粒

紅辣椒 - 2隻

印尼咖哩醬 - 1包

咖哩粉 - 2茶匙

椰漿 - 400毫升

水 - 150毫升

做法：

1）先凖備2支香茅切碎，2粒蒜頭和紅蔥頭拍爛；2茶匙咖哩粉

2）雞扒溶雪吸乾水； 斬件後加入1）之醃料醃15分鐘（當然越耐越入味）

3）甘筍, 薯仔, 洋蔥去皮滾刀切件； 餘下2支香茅, 蒜頭, 紅蔥頭拍香後備用 （香茅只要根部五吋左右）

4）落油落蔥頭，蒜頭起鑊；

5）爆香薯仔，甘荀及洋蔥，裝返起去（因為懶洗多隻鑊）

6）落油煎香雞件至兩面金黃，加5）材料

7）加入印尼咖哩醬，水，搞均至醬料溶哂；加入200ml 椰漿及蕃茄

8）煮半個鐘後試味，如偏咸可加糖吊返甜味出來，記得不時搞搞佢

9）通常我煮佢大約一個鐘；臨食前加埋餘下200ml 椰漿煲一陣等佢香D

10）我覺得個汁稀左小小，於是加左麵粉煲左陣（呢個步驟可以skip)

11) 完成

註：材料圖樣：

自家荔枝酒

夏天到，又係食荔枝的當造季節。

同事老公新鮮樹上摘，有幸R到2磅返黎。咋咋淋浸左去，以免好甜的大相公食鬼哂！

自家荔枝酒

材料：

荔枝 - 2磅

桂花陳酒 - 2枝（約1.5L)

冰糖 - 1 粒 （乒乓波大小）

大樽 - 1個

做法：

1）大樽用滾水內外上下連蓋過水消毒，之後自然風乾

2）荔枝去皮去核

3）將所有野放哂入樽

4）扭蓋

5）靜待短至3個月，長至2年

6）搞掂

註：期間得閒探下佢，搖下佢。見過有朋友自行爆樽，小心小心！

蕃茄燴牛尾

森師奶咁有心機煮野食，階只因為食。

而點解會咁為食？當然係森媽由細訓練出來啦！

好一句「辛苦揾黎至在食」，森爸一個返工養我地，森媽梗係要煮好d,等佢有氣有力啦！

雖然森媽也得承認而家而經冇咁鐘意煮；但依舊好味。

啱啱我就拎左盒蕃茄燴牛尾返森家，食到光哂塘呀!

檸檬薏米水

香草焗三文魚

早前的超市大特賈，師奶仔又點會放過呢？！

主打都係凍肉貪佢可以襟擺d. 所以冰格長期Full House 狀態呢！

只要响前一晚放定响冷藏格溶雪第二日快醃一下，焗一焗就搞掂啦！（如果以前我會叫下格；但係而家好多雪柜下格變左上格。。。大家明唔明我而家講緊邊一格？）

香草焗三文魚

材料：

三文魚 - 2舊

香草 - 隨意（我用左Parsley, Basil)

黑椒 - 隨意

鯷魚（連橄欖）- 4粒

檸檬汁 - 半個

海鹽 - 少許

做法：

1) 先把三文魚解凍, 用廚紙吸乾水

2) 焗爐200 度預熱

3) 三文魚四邊查均香草, 黑椒

4) 底面扭小小海鹽, 及於底部放2料橄欖鯷魚

5) 室温醃10分鐘

6) 加檸檬汁後放焗爐底面各焗10分鐘 (即係每10分鐘反一次)

7) 搞掂

註: 橄欖鯷魚响數字屋有售, 咸香咸香的, 幾好食 (但唔好放太多粒)

豆付卜饟墨魚滑

上網見到有人用光波爐整呢個餸, 見咁易整就最啱我呢d快靚正!

食上口有點似唔臭既臭豆付；配埋我個泰式汁，好野味呢！

豆付卜饟墨魚滑

材料：

豆付卜 -  約8粒 （因响超市買了一包，唔知有幾重，如果街市豆付檔，買4兩已夠）
墨魚滑 -  1 盒 (又係响超市買的, 其實可以响街市買包好的或4兩)
胡椒粉 - 少許
鹽 - 少許

做法:
1) 墨魚滑加入胡椒粉及鹽拌勻
2) 焗爐200度預熱
3) 把豆卜一開二, 之後把豆卜反轉
4) 將墨魚滑饟入豆卜
5) 放入焗爐以200度爐20分鐘
6) 倒定醬汁
7) 搞掂

註: 今次我用左泰式粉絲個醬汁恬黎食, 好正好野味.
註2: 食完大相唔夠喉, 安歌就咁焗反轉左既豆卜, 一樣咁好食
註3: 最緊要焗得夠亁身就好好味



泰式汁 做法:

http://sumc9.blogspot.com/2014/06/blog-post_4904.html#

香蒜肉碎茄子

放工見到大大隻茄子五蚊有兩隻，唔抵得唔買。

於是第一次弄了這個餸，意想不到的好吃呢！

香蒜肉碎蒸茄子

材料：

茄子： 2大支

蒜蓉： 多

肉碎： 5蚊 (買10蚊分2次用)

蔥花： 少許

做法：

1） 把茄子洗淨切段放LC煲上

2） 茄子上舖上肉碎及蒜蓉

3） 加兩湯匙水

4） 加蓋以中火蒸3分鐘，轉小火5分鐘，焗5分鐘

5） 加蒽花後食得！

註：拎出來個樣好似好生咁，食上口兩回事呢！

龍蝦意大利飯

星期六宅在家，最好就係搞搞大龍鳳。

閒時大相公成日話我買咁多野返黎，而家就係發揮好處既時候；足不出戶，動用屋企物資，都有好野食到啦！（交叉手吹口哨）

龍蝦意大利飯

材料：

意大利米: 1杯 （不用洗米）

急凍龍蝦： 1隻

蔥頭： 3粒

洋蔥： 1個（切碎）

雞湯：800ml

Mozzarella  cheese: 50g

牛油：50g x 2

做法：

1）急凍龍蝦室温解凍起肉，留殼

2）爆蔥頭，落一半洋蔥碎，落龍蝦殼加雞湯至滾起；之後隔渣湯留起備用

3）落50g 牛油起鑊，落米，炒一陣令米沾上牛油

4）加入上湯（約一碗）炒至乾，重複此動作（加上湯炒乾）炒至米粒發脹至大半粒米變軟

5）加入餘下洋蔥碎及龍蝦繼續炒

6）如覺米粒太硬，加半碗上湯，上蓋焗2分鐘（或更少時間）至自己喜愛軟硬度

7）加入 Mozzarella cheese 伴均

8）搞掂

註：上次買數字屋的龍蝦好咸。

海鮮Pizza

在朋友家食過自家制pizza 後，

易做又好味，成日心癢癢想試下。

有日放工行開街市烘焙店，驚見有現成餅底賣！即刻買個返黎試下先！

海鮮Pizza

泰式粉絲

多天沒下雨，悶熱的日子叫人也悶悶的。

大相公努力揾錢，於是整左個開胃餸（飯？）等佢响悶熱氣温降降温！

泰式粉絲

村料：龍口粉絲 2 包

急凍蝦： 8隻

搞碎瘦肉：5蚊 （買左10蚊分2次用）

紅蔥頭：2粒

洋蔥：1個切絲

紅色小辣椒：1隻

芫茜碎：少量

水：120毫升

調味：

泰式雞汁： 1湯匙

青檸汁： 2湯匙

蠔油： 1湯匙

魚露： 2茶匙

糖： 少許

辣椒粉：1茶匙

做法：

建議早一晚做定，以確保整個餸夠凍

1）先把粉絲浸淋；浸淋後出水（放入滾水煮淋）；之後隔水放雪柜備用 

2） 急凍蝦溶雪後用鹽及胡椒醃十分鐘

3） 肉碎肉豉油，豆粉，糖 加少許花椒油（可唔加）醃十分鐘（或更長時間）

4）把以上調味部份調好

十分鐘後。。。

1）120毫升水加雞粉煲滾

2）水滾後加入肉碎搞散肉碎

3）加入蝦仁及洋蔥，紅蔥頭

4）肉及蝦仁熟後加入已調好的調味汁

5）當味調再滾時熄火

6）坦涼後汁連料放雪柜（預2小時雪凍）

7）食時把汁料淋上粉絲；小辣椒及芫茜剪碎洒上面；伴均後食得！

尖椒皮旦

夏日炎炎, 少開爐為妙.

試了這個尖椒皮旦, 大相公食過話要安歌呢!


尖椒皮旦

以下係網上食譜(為我實際評語)

材料:

皮旦：3隻

尖椒: 1隻 (下次要加至2隻)
蒜頭: 3-4粒 (實際加多左, 約5-6粒)
指天椒: 1隻 (實際用左2隻)
芫茜: 2蚊

註: 皮旦數量不限, 不過得2個人食, 所以落三隻旦
註2: 怕左街市10蚊5隻付帶臭壓味; 於是買左味美棧的皮旦 (19蚊4隻); 又大又溏心


調味料:

糖: 1 茶匙
辣椒油: 1 湯匙
花椒油: 1 湯匙
鎮江醋: 2 湯匙
生抽: 1 湯匙
老抽: 1 湯匙

註:以上是基本份量, 實際自行再加加減減至自己口味



做法:

1) 皮旦一開四
(如好刀工的可一開六什至八; 另早一日買旦的話, 可事前放旦格雪凍, 以減少下列6之時間)
2) 尖椒去籽
3) 調味料混好
4) 尖椒, 蒜頭, 指天椒和芫茜剁碎
5) 調味料混至碎碎(4)中
6) 調味碎(5)淋到皮旦上, 雪半小時(或更耐)
7) 食得

日式鰻魚飯

在家對住四面牆，去街又要使錢；

於是去下圖書館，嘆下冷氣順暢搜集一下黎緊去旅行的資料。

期間收到大相公下指，好掛住日本野食，今晚可唔可以食鰻魚飯？

難得大相公會落order, 順便而家食緊响日本拎返來的新潟米，咁就盡量安排啦！

去到日式超市，行呀行，點解只有急凍鰻魚呢？乜唔係有細細條果d 既咩？

條鰻魚成百四蚊好貴啊！ 行左成個鐘， 諗呀諗。。。。。。

又唔係成日食咁貴，買來試試吧（魔鬼說）。

睇下，真係好大條呀，有成個焗盆咁大咖！

焗返熱去， 加埋之前的日本漬物，海藻沙律，同埋味噌湯。

簡簡單單就一餐了， yummy!

重新啟動

冇掂個卜幾個月, 把心一橫要記錄低我玩過, 煮過乜先得!! (握拳)